Москванинг "Спартак" жамоасига мухлис бўлган Отто Фишер 102 ёшида оламдан ўтди. Бу ҳақда "Р-Спорт" нашри "Спартак"нинг жамоатчилик билан алоқалар департаменти директори Леонид Трахтенбергга асосланган ҳолда хабар тарқатган.
Шу йилнинг сентябрь ойида Фишер қўлини синдириб олганидан кейин тўшакка михланиб қолганди.
Уни дафн қилиш маросими 23 ноябрга белгиланган.
Отто Фишер 1913 йилда Саратов вилоятида туғилган. 1917 йилда етим қолгач, Москвадаги тоғасининг оиласи томонидан асраб олинган. У ҳаётининг охирги кунларини Челябинск вилоятининг Копейске мавзесида ўтказган.
У "Спартак" жамоасининг барча сафар ўйинларига борар эди. Жаноб Фишер шу йили "Спартак" ва "Динамо" ўртасидаги ўйинга жамоа фан клуби томонидан фахрий меҳмон сифатида таклиф этилган, майдонга чиқиб, тўпни тепиб бериш орқали ўйинни бошлаб берганди. Шундан сўнг у россияликлар орасида машҳурликка эришган.
