Тошкентнинг “Локомотив” клуби 2015-йилги мавсумни Олий Лигада иккинчи бўлиб якунлаганидан хабарингиз бор.

“Темирйўлчилар” жамоаси сафида мавсум давомида фаол тарзда ўйин кўрсатган футболчилардан бири бўлган Санжар Шоаҳмедовнинг фикрича, ортда қолган мавсум “Локо” учун ёмон ўтмади.

- Олий Лига-2015дан жуда ажойиб таассуротлар қолди. Зеро бу йил чемпионатимиз анчагина қизиқарли тус олди. Жамоалар ҳар бир учрашувда майдонга фақат очко олиш илинжида тушишди. Бу эса ўйинларнинг муросасиз ўтишини таъминлади.

“Локомотив” мавсум аввалида ўз олдига чемпион бўлиш вазифасини қўйганди. Биз ҳам олтин медалларни қўлга киритиш учун қўлдан келганча ҳаракат қилдик. Аммо якунда иккинчи ўриндан жой олдик. Ўйлашимча, бу ёмон натижа эмас.

Ўзим ҳақимда гапирадиган бўлсам, 2015-йилги мавсумда футболчи сифатида ўсдим, дея оламан. Боиси доимий ўйин амалиётига эга бўлдим ва кўплаб учрашувларда голлар киритишга эришдим. Ортда қолган мавсумда 14 та тўп киритдим. Илгарилари бундай натижа қайд этмагандим. Шу сабабли ҳам буни шахсий ютуқ, дея айта оламан. Умуман олганда, 2015-йилги мавсум ёмон ўтмади, - дейди маҳоратли ярим ҳимоячи SPORTS.uz интернет порталига.