АҚШнинг Хьюстон шаҳрида оғир атлетика бўйича катталар ўртасида ўтказилаётган жаҳон чемпионатида айни пайтга келиб 12 нафар спортчимиздан 7 нафари баҳсларда иштирок этди.

Бугун Тошкент вақти билан соат 06:25да хотин-қизлар ўртасида 69 кг. вазн тоифасида баҳсларга киришган Манзурахон Мамасолиева даст кўтаришда 102 кг., силтаб кўтаришда эса 131 кг тошни ўзига бўйсинтирди ва иккикураш якунига кўра 233 кг. натижа қайд этиб, “В” гуруҳида биринчи ўринни эгаллади. Ушбу вазн тоифасида “А” гуруҳи вакилларининг чиқишидан сўнг, якуний натижалар эълон қилинади.

Бугун эрта тонгда, шунингдек, эркаклар ўртасидаги 85 кг. вазн тоифасида “А” гуруҳидан ўрин олган спортчилар ўртасида мусобақа ўтказилиб, якуни натижалар маълум бўлди. Унга кўра, ҳамюртларимиздан Улуғбек Алимов 360 кг. натижа билан 8-ўринни, Муҳаммад Бегалиев эса 344 кг. кўрсаткич билан 16-ўринни эгаллади.

Бугун Тошкент вақти билан соат 19:00да терма жамоамиз аъзоси Фарҳодбек Собиров вазни 94 кг.гача бўлган спортчиларнинг “С” гуруҳида баҳсларга киришади.

Эслатиб ўтамиз, 29 ноябрга қадар давом этадиган мазкур дунё биринчилигида 98 давлатдан жами 609 нафар спортчи (шундан 266 нафари аёллар) ғолиблик учун кураш олиб борадилар.