ФИФА бугун 2015 йилда жаҳоннинг энг яхши футболчисига даъвогар 3 футболчининг номини эълон қилади.

Испаниянинг "Mundo Deportivo" нашрига кўра, «Олтин тўп» учун даъвогарлар рўйхатига Лионель Месси, Неймар (иккиси — «Барселона») ва Криштиану Роналду («Реал») киради.

Мазкур рўйхатдан «Барселона» ҳужумчиси Луис Суарес ўрин олмайди. Испан нашри тахминича, уругвайлик ҳужумчи кучли учликка кириш учун етарли балл йиғмаган. Шу тариқа, "кўк-анорранглилар" 2010 йилги натижани такрорлай олишмайди. Ўшанда "Барса"нинг уч футболчиси - Лионель Месси, Хави ва Андрес Иньеста "Олтин тўп" учун асосий номзод бўлишганди.

Месси 4 марта (2009, 2010, 2011, 2012), Роналду 3 марта (2008, 2013, 2014) нуфузли совринни қўлга киритган. Неймар учликка илк марта киради. Бразилиялик ҳужумчининг энг яхши натижаси 2013 йилда қайд этилганди - 5-ўрин. У сўровномаларда 2011 йилда 10, 2012 йилда 13, 2014 йилда 23-ўринларни банд этган.

2015 йилги соврин учун курашда аргентиналик 28 ёшли фаворит ҳисобланмоқда. Ғолиб номи 11 январь куни эълон қилинади.