Жорий йилнинг 5-6 декабрь кунлари Мексика пойтахти Мехико шаҳрида Таэквондонинг WTF йўналиши бўйича Гран-При турнирининг ҳал қилувчи финал мусобақаси ўтказилади.    Дунёнинг энг кучли таэквондо усталари иштирокида (ҳар бир вазнда 8 нафардан) ўтказиладиган мазкур нуфузли мусобақада 2016 йили Рио-де-Жанейро шаҳри (Бразилия)да ўтказиладиган XXXI ёзги Олимпиада ўйинларининг йўлланмалари ҳам ўйналади.    Мехико Гран-Приси якунлангач, Олимпиада рейтингининг якуний жадвали эълон қилинади. Унга кўра, ҳар бир вазн тоифасида 1-6 ўринларни банд этган таэквондочилар “Рио-2016” ўйинларининг йўлланмаларига эга бўладилар.    Мазкур нуфузли мусобақада Ватанимиз шарафини амалдаги жаҳон чемпиони Дмитрий Шокин ва жаҳон чемпионати кумуш медаль совриндори Жасур Бойқўзиев ҳимоя қилади.    Гран-При турнири ниҳоясига етгач, 8-9 декабрь кунлари шу ернинг ўзида жамоавий жаҳон кубоги баҳслари ўтказилади. Ҳар бир терма жамоадан 6 нафардан спортчи ўрин эгаллайди. Ўзбекистон терма жамоаси таркибидан Дмитрий Шокин, Жасур Бойқўзиев, Максим Рафалович, Никита Рафалович, Валентин Хегай ва Темур Ўролов жой олишган.    Ҳамюртларимизга бўлажак масъулиятли мусобақаларда ҳам омад ва зафарлар тилаб қоламиз. Терма жамоамиз аъзолари 1 декабрь куни соат 04:30да Мехико шаҳрига жўнаб кетадилар.