«Барселона» ҳимоячиси Херард Пике ўзининг Твиттердаги саҳифаси орқали "Кадис"га қарши ўйинда Денис Черишевни майдонга туширгани учун "Реал" Испания кубогидан четлатилиши мумкинлиги ҳақидаги хабарга эълон қилган "твит"ига изоҳ бериб ўтди. Пике кулавериб кўзларидан ёш чиқиб кетган 9та "смайл" "ёзганди".

«Мен ҳажвий шоу кўраётганим учун шундай «твит» ёздим. Мени биласизу, шунчаки ҳазиллашдим. Инсонлар бундан фожиа ясамасликларини сўрардим, бу шунчаки ҳазил эди.


Мен Черишевни қўллаб-қувватлашни истайман, у профессионал. Умид қиламан, у билан боғлиқ вазият тезда ҳал бўлади. Мен ҳам шунга ўхшаш ҳолатга тушгандим. Мавсум сўнгида дисквалификация олиб, мавсумнинг биринчи ўйинида майдонга туша олмагандим. Лекин бундан хабарим бор эди. Шунингдек, клубдан бундай маълумотни олгандим», — дейди Пике.