Гватемала ҳуқуқ-тартибот органлари Халқаро футбол федерациясидаги (ФИФА) коррупция иши бўйича айбланаётган мамлакат футбол федерацияси президенти Брайан Хименесни қамоққа олишга ордер берди. Бу ҳақда «ТАСС» хабар бермоқда.

Прокуратура вакилининг айтишича, АҚШдан Хименесни ҳибсга олиш ва кейинчалик экстрадиция қилиш юзасидан сўров келиб тушган. Мансабдор пора олиш, маблағдан ноқонуний фойдаланиш ва жиноий келишувда айбланмоқда. Хименес ўзига қўйилган айбларни рад этмоқда, айни пайтда унинг қаерда эканлиги номаълум.

Эслатиб ўтамиз, олдинроқ Эквадор футбол федерацияси президенти Луис Чирибога уй қамоғига олинганлиги ҳақида хабар берилганди.