Хабарингиз бор, бугун Малайзиянинг Куала Лумпур шаҳрида Осиё Чемпионлар Лигасининг 2016 йилги мавсумига қуръа ташланди. Ўзбекистон клублари ўзларининг гуруҳдаги рақибларини билиб олишди.

Унга кўра, қитъамизнинг энг нуфузли мусобақасида Қаршининг “Насаф” клуби “D” гуруҳида Саудия Арабистонининг “Ал-Аҳли”, Бирлашган Араб Амирликларининг “Ал-Айн” ва саралаш баҳслари ғолиби (“Нафт” (Эрон) / “Ал-Жаиш” (Қатар) билан куч синашади.

“Аждарлар” жамоаси расмий сайтининг ёзишича, 2016 йилги Осиё чемпионлари лигасига қуръа ташлаш маросимидан сўнг “Насаф” устози Рўзиқул Бердиев гуруҳдаги рақиблар ҳақида ўз фикрлари билан ўртоқлашди.

"Гуруҳимизда кучли жамоалар жамланган. Умуман бу турнирда кучсиз жамоа йўқ, -дея ўз фикрларини билдирди Рўзиқул Саъдуллаевич. – Гуруҳда бизга рақиблик қилаётган барча жамоалар ўз чемпионатларида юқори поғоналарда боришмоқда. Албатта, биз ҳам бу галги ҳар доимгиданда жиддий тайёргарлик кўрамиз. Қолаверса, ўтган йили ҳам ОЧЛ гуруҳ босқичида қатнашиб, тажрибамизни оширдик. Биринчи навбатда таркибимизни кучайтиришимиз лозим. Турнир бошлангунига қадар рақибларимизни янада чуқурроқ ўрганамиз. Насиб этса, бу галги баҳсларга муносиб қатнашишга ҳаракат қиламиз. Омад биз томонда бўлса, натижаларимизни яхшилашга уринамиз".