“Насаф”нинг ОЧЛдаги илк рақиби Саудия Арабистонининг “Ал Аҳли” клуби кеча мамлакат чемпионатининг 10-турида   “Ал Ҳилол” жамоаси меҳмони бўлиб, уйга уч очко билан қайтадиган бўлди.

Швейцариялик мутахассис Кристиан Гросс бошқарувидаги “Ал Аҳли” футболчилари Ар Риёд шаҳридаги Қирол Фаҳд стадионида кечган беллашувнинг 24-дақиқасида Ҳусайн Ал Могавининг аниқ зарбасидан кейин ўйинда ҳисобни очишди. 47-дақиқада “Ал Ҳилол”нинг бразилиялик ярим ҳимоячиси Карлос Эдуардо ўйинда мувозанатни тиклади. Аммо ўйиннинг 68-дақиқасида Моҳанад Асири жиддаликларга ғалаба келтирувчи голни киритиб, жамоасининг сафардан ғалаба билан қайтишини таъминлади. Таъкидлаш жоизки, учрашувнинг 57-дақиқасида “Ал Ҳилол” жамоасининг бразилиялик ҳужумчиси Аилтон Алмейда 11-метрлик жарима зарбасини голга айлантира олмади.

Мазкур ғалабадан кейин “Ал Аҳли” футболчилари 24 очко тўплаб, турнир жадвалида “Ал Ҳилол” билан қўшҳокимлик қилишмоқда.

Эслатиб ўтамиз, “Насаф” футболчилари ОЧЛнинг “Д” гуруҳида илк учрашувни сафарда айнан “Ал Аҳли” жамоаси билан ўтказишади.