ТЕШАВОЙ: Болтавой! Голмисиз, офсайдмисиз?
БОЛТАВОЙ: Айтганингизман.
ТЕШАВОЙ: Одамни бир хурсанд қилиб осмонларга олиб чиқасизда, яна бошқа куни кайфиятни ерга уриб тушириб қўясиз, Абрамовмисиз?
БОЛТАВОЙ: Тешавой! Голмисиз, офсайдмисиз?
ТЕШАВОЙ: Айтганингизман.
БОЛТАВОЙ: Кечга белгиланган тўйни олдинга суриб, кундузи ўтказишга мажбурладингиз, “аллақандай Гордон”мисиз?
ТЕШАВОЙ: Голмисиз, офсайдмисиз, тўпмисиз, коптокмисиз?
БОЛТАВОЙ: Айтганингизман.
ТЕШАВОЙ: Менку, тўйни олдинга сурибман, сиз эса “номаълум муддатга” қолдирдингиз, ПФЛмисиз?
ТЕШАВОЙ: Голмисиз, офсайдмисиз, тўпмисиз, коптокмисиз?
БОЛТАВОЙ: Айтганингизман.
ТЕШАВОЙ: Дўстлар билан чойхонада ўтирганда эҳтиёт бўлсангиз бўлармиди? Ҳар турганингизда кимнидир қўлини босиб оласиз, Пепемисиз?
БОЛТАВОЙ: Голмисиз, офсайдмисиз, тўпмисиз, коптокмисиз?
ТЕШАВОЙ: Айтганингизман.
БОЛТАВОЙ: Ўша чойхонадаги гурунгларда гап-сўзингизга эътиборлироқ бўлинг. Ҳамма бир мавзудан гапирса, сиз бошқа мавзудан гап суқиб, “калла қўясиз”, Зиданмисиз?
ТЕШАВОЙ: Голмисиз, офсайдмисиз, тўпмисиз, коптокмисиз?
БОЛТАВОЙ: Айтганингизман. ТЕШАВОЙ: Ҳамма кўзи билан кўриб турган нарсани “кўрмадим” деб енгмоқчи бўласиз, ҳакаммисиз?
БОЛТАВОЙ: Голмисиз, офсайдмисиз, тўпмисиз, коптокмисиз?
ТЕШАВОЙ: Айтганингизман. БОЛТАВОЙ: : Сиз билан музей айланиб бўлмасакан, “қўл текизилмасин” десаям, экспонатларни ушлаб кўрасиз. “Менга ушлаш мумкин” дейсиз, дарвозабонмисиз?
ТЕШАВОЙ: Голмисиз, офсайдмисиз, тўмисиз, коптокмисиз?
БОЛТАВОЙ: Айтганингизман. ТЕШАВОЙ: Ўзингиз билан ҳам шаҳар айланиб бўлмасакан, кириш мумкин бўлмаган жойларнинг панжарасидан сакраб ўтиб кетяпсиз, Жимми-жампмисиз?
БОЛТАВОЙ: Голмисиз, офсайдмисиз, тўпмисиз, коптокмисиз?
ТЕШАВОЙ: Айтганингизман.
БОЛТАВОЙ: Ҳамма ёмон иш қилиб қўйган одамни сўкса, қўшилиб сиз ҳам сўкасиз-да, яна тарафиниям олиб қўясиз. Сиз бир томон бўлинг: ё сўкинг, ё тарафини олинг. Ёки “яримҳимоячи”мисиз?
ТЕШАВОЙ: Голмисиз, офсайдмисиз, тўпмисиз, коптокмисиз? БОЛТАВОЙ: Айтганингизман.
ТЕШАВОЙ: Одамлар “Тешавой эплолмаган ишини қўли билан қиляпти” дейишяпти, Марадонамисиз?
БОЛТАВОЙ: Голмисиз, офсайдмисиз, тўпмисиз, коптокмисиз? ТЕШАВОЙ: Айтганингизман.
БОЛТАВОЙ: Ёшингиз бир жойга бориб қолсаям, ёшларни ҳеч тан олгингиз келмайди Пелемисиз?
ТЕШАВОЙ: Голмисиз, офсайдмисиз, тўпмисиз, коптокмисиз?
БОЛТАВОЙ: Айтганингизман.
ТЕШАВОЙ: Сал нарсага хафа бўлиб, сиқиладиган одатингиз бор. Биров хафа қилиб қўйса, унутолмайсиз, довдираб ўзингизга келмай юрасиз, олимпиячимисиз?
Рустам Сулаймонов
