Биласиз, айни пайтда Самвел Бабаян бошчилигидаги Ўзбекистон олимпия терма жамоаси 2016 январь ойида бўлиб ўтадиган Осиё чемпионатига тайёргарлик кўрмоқда.
Олимпиячиларимиз яқиндагина БААда йиғин ўтказиб қайтиб келишди. Эндиги йиғин ҳам 19-28 декабрь кунлари Дубайда ташкил этилади. Диққатга сазовор жиҳати шундаки, мазкур йиғинга ҳозирда Сербиянинг “Явор” жамоасида ҳаракат қилаётган ҳамюртимиз Ҳусниддин Ғофуров ҳам таклиф этилди. Иқтидорли футболчи Дубайдаги йиғинда иштирок этади ва агар унинг ҳаракатлари мураббийлар штабида яхши таассурот қолдирса, катта эҳтимол билан Қатарда бўлиб ўтадиган Осиё чемпионатига ҳам боради.
Таъкидлаш жоиз, олимпиячиларимизнинг 2-9 январь кунларига мўлжалланган якуний йиғин ҳам Дубайда ўтиши режалаштирилган. Кейин олимпиячиларимиз Дохага йўл олишади ва 13 январда Жанубий Корея олимпия терма жамоасига қарши учрашув билан Осиё Кубогидаги иштирок бошланади.
Осиё чемпионати 12 – 30 январь кунлари Қатарда бўлиб ўтади. Ўзбекистон олимпия терма жамоаси турнирнинг гуруҳ босқичида Ироқ, Жанубий Корея ва Яман олимпия терма жамоалари билан баҳс олиб боради.
