Александр Кержаков 1 январдан "Цюрих" жамоаси сафида ўйнай бошлайди.

Россия терма жамоасига номзод ҳисобланадиган "Зенит" ҳужумчиси Александр Кержаков ижара асосида Швейцариянинг "Цюрих" жамоасида фаолиятини давом эттирадиган бўлган.

У швейцарияликлар билан мавсум охиригача шартнома тузган.

Қайд этиш керакки, жорий мавсум аввалида Кержаков питерликларнинг асосий таркибига кира олмади. У жамоа бош мураббийи Андре Виллаш Боаш билан келиша олмай қолганди.

Футболчининг ўзи бироз олдинроқ унга португалиялик мураббий жамоа базасида кўриниш бермаслик талабини қўйгани ҳақида айтиб ўтганди.

Кержаков Россия терма жамоаси тарихидаги энг яхши ҳужумчи саналади. У Россия чемпионатида 224та, терма жамоа сафида эса 30та гол уриш орқали бу номга сазовор бўлган.

Маълумот учун, "Цюрих" жамоаси айни вақтда Швейцария чемпионатидаги 10та жамоа орасида тўққизинчи бўлиб турибди. Жамоага собиқ футболчи Сами Ҳююпя мураббий ҳисобланади. "Цюрих"нинг янги 2016 йилдаги илк ўйини 6 февраль куни ички чемпионат доирасида "Сьон" жамоасига қарши ўтказилади.

"Цюрих"да яна бир россиялик ёш футболчи Артем Симонян ҳам тўп суради.