Бугун жамоамиз аъзолари Наманганда тўпланиб, 2016 йилги мавсумга тайёргарлик жараёнини бошлашди. Дастлабки куни ўтказилган машғулотда 18 нафар футболчи иштирок этганлигини айтиб ўтиш жоиз. Рашид Ғофуровга машғулотни ўтказишда Мустафо Байрамов ва Шерзод Жўраевлар ёрдам беришди. Футболчилар бугун асосан югуриш машқлари билан шуғулланишди. Маълум вақт давомида эса тўп билан боғлиқ машқлар ҳам бажарилди. Таътилдан қайтган жамоамиз таркиби тўлиқ йиғилганича йўқ. Бугунги машғулотда “Бунёдкор” жамоасидан таклиф этилган Тимур Аюпов ва Азиз Мамазоитовлар шуғулланишди. Маҳаллий бўлган Сардор Асқаров ҳам жамоада кўрикдан ўтмоқда. Бундан ташқари олдинги мавсумларда "Навбаҳор" шарафини ҳимоя қилган Соҳиб Абдуллаев ҳам жамоа билан бирга шуғулланди. Шунингдек, ёшлар таркибининг бир қатор ўйинчилари ҳам машғулотда қатнашишди. Бундан ташқари ўтган мавсум биринчи ярмини “Навбаҳор”да ўтказиб, иккинчи даврада “Локомотив”га ўтиб кетган ҳужумчи Мўйдин Мамазулумов ҳам айни пайтда жамоа билан бирга бўлиб турибди. Кейинги машғулотларда таркибга янги ўйинчиларни қўшилиши кутилмоқда.