Ўзбекистон миллий терма жамоаси бош мураббийи Самвел Бабаян ва терма жамоа сардори Одил Аҳмедов ФИФА томонидан ўтказилган жаҳоннинг 2015 йилдаги энг яхши футболчиси сўровномасида Лионель Мессига овоз берди. Бу ҳақда «Олтин тўп» тақдимотидан сўнг ФИФА томонидан эълон қилинган сўровнома якунларида маълумот берилган.

Сўровнома бўйича Самвел Бабаяннинг ҳам, Одил Аҳмедовнинг ҳам танлови бир хил кўриниш олган. Мураббий ва унинг шогирди сўровномада биринчи ўринга Мессини, иккинчи ўринга Криштиану Роналдуни, учинчи ўринга эса ҳужумчи Неймарни лойиқ деб топган.

Ўзбекистон номидан сўровномадан иштирок этган учинчи вакил — ЎзПФЛ матбуот котиби Григорий Ртвеладзе Криштиану Роналдуни биринчи ўринга, «Барселона» ҳужумчиси Луис Суаресни иккинчи ўринга, «Бавария» вакили Томас Мюллерни эса учинчи ўринга жойлаштирган.

Эслатиб ўтамиз, 11 январь куни Швейцариянинг Цюрих шаҳрида «Олтин тўп» тақдимоти бўлиб ўтди. Унда 2015 йилнинг энг яхши футболчиси номи эълон қилинди. Йил якунларига кўра, «Барселона» ҳужумчиси Лионель Месси фаолиятида бешинчи бор «Олтин тўп» эгасига айланди.