Ўтган ҳафтадан бошлаб “Насаф” ўринбосарлар жамоаси янги мавсумга тайёргарликка киришди.
Айни пайтда жамоа таркибида бир қатор ўзгаришлар бор. Ўтган йили ёшлар лигаси баҳсларида ўзларини ҳар томонлама кўрсата олган Сирожиддин Қўзиев, Акбар Муродов, Ислом Рашидхонов, Дилшод Хушбаков, Нажмиддин Нормуродов сингари ёшлар асосий таркибга жалб этилган. Ўз навбатида “Насаф” футбол мактаби битирувчилари Худоёр Сагдуллаев, Сирож Еттибоев, Дилшод Насруллаев, шунингдек Амир Ҳошимов ўринбосарлар жамоаси машғулотларида иштирок этишмоқда.
Жамоа аъзолари кунига икки маҳала машғулот ўтказишмоқда. Машғулотлар “Геолог” стадиони ва “Насаф” футбол мактабига қарашли сунъий қопламали майдонда ўтказилмоқда. Куни кеча ўринбосарлар жамоасини Нишоннинг “Нуристон” футболчилари билан назорат учрашувини ўтказиб, 2:2 ҳисобидаги дурангга эришишди. Улар навбатдаги назорат учрашувида эртага Косоннинг “Аланга” жамоасига қарши майдонга чиқишади.
