Тиниб-тинчимас корейс ОАВлари бир йил аввал Қирол Кубогида Тоҳир Шамсиддиновдан калтак еган Шим Санг Миннинг ҳам ўйинолди фикрларига қизиқди.
“Ўзбекистондан қасос олиш ҳақида ўйлаганим йўқ. Бу муҳим бир ўйин. Шахсий ғаразларимни ўртага солишим тўғри эмас. Илк ўйинни ҳотиржамлик билан ютишимиз керак”, деди кей-лигадаги “Сеул” клуби ҳимоячиси саналган Шим Санг Мин "Daily Sport" нашрига берган интервюсида.
Журналистларнинг тўхтовсиз қистовларидан кейин Шим Санг Мин заҳарҳанда кулимсираб, барибир дилидагини тилига чиқарди:
”Ўша воқеаларни бутунлай ёдимдан чиқарганман, дея олмайман. Ўзбекистон оддий рақиб эмас. Бу сафар бизнинг ҳужумчилар ўзбеклар дарвозасига 3та жавобсиз гол уришларини истайман. Йўқ, йўқ ундан ҳам кўпроқ гол уришимизни хоҳлайман. Мени доим қўллаб-қувватлаётган мухлисларимдан миннатдорман”.
Эсингизда бўлса, ўтган йили Таиландда ташкиллаштирилган Қирол Кубоги турнирида олимпия терма жамоамиз собиқ аъзоси Тоҳир Шамсиддинов Шим Санг Миннинг юзига бир неча бор мушт туширган эди.
Корейс ОАВлари хабарлари асосида ОТАБEК ЙЎЛДОШEВ тайёрлади
