Жамоамиз аъзолари бугун ҳам икки маҳал машғулот ўтказишди.
Эрталаб футболчиларимиз “Марказий” ўйингоҳда асосан югуриш машқларини бажаришди. Кечки пайтдаги машғулот эса “Динамо” ўйингоҳида ўтказилди. Машғулотлар якунига етгач, жамоамиз аъзолари Тошкентга йўл олишди. Футболчиларимиз пойтахтда 31 январга қадар шуғулланишади. Пойтахт сафари олдидан мураббийлар штаби машғулотларда қатнашган бир қатор футболчиларга жавоб беришди. Абдуазиз Султанов, Зокир Нурматов, Азизбек Мамазоитов ва Мирзоҳид Собировлар шулар жумласидандир. Бундан ташқари, Сардор Теляков, Муҳаммад Расулов, Дониёр Инамов, Ҳожиакбар Юнусовлар Наманганда қолиб ёшлар таркибида шуғулланишади. Пойтахтдаги ўқув-машғулот йиғинида жамоамиз таркибига бир қатор футболчиларни қўшилиши режалаштирилган. Хусусан, ўтган мавсум иккинчи ярмини жамоамиз дарвозасини қўриқлаган Акмал Ортиқов ҳам сафга қўшилади. Айни пайтда ушбу дарвозабон қолган жамоамиз аъзолари билан биргаликда Тошкентга кетмоқда. Ортиқовнинг “Олмалиқ” билан амалдаги шартномаси борлиги сабабли олмалиқликлар йиғинида қатнашаётганди. Тошкентда назорат ўйинлари ҳам ўтказилади. Дастлабки учрашув 17 январь куни Қаршининг “Насаф” жамоасига қарши бўлиб ўтади.
