Америкаликлар 2015 йилнинг "энг чиройли голи" номинациясига даъвогарлик қилган "Барселона" ҳужумчиси Лионель Месси томонидан Испания кубоги финалида "Атлетик" дарвозасига урилган голни ипидан игнасигача илмий таҳлил қилиб чиқишди.

Гол билан якунланган ҳаракатнинг бошланғич қисмида Месси майдоннинг қисқа масофасида 2,7 секунд давомида тўп билан ҳаракатланиш тезлигини 31,38 км/соатга чиқарди. Таққослаганда шу нарса маълум бўлдики, тўпсиз ҳаракат қилаётган ва тўғри чизиқ бўйича югураётган спортчи учун Мессининг тезллигига эришиш учун бундан кўпроқ вақт ва масофа кетар экан.

Лионель томонидан берилган ҳал қилувчи зарба пайтида тўпнинг тезлиги соатига 77,25 км.ни ташкил қилган. Боз устига, аргентиналик футболчида зарбага чоғланиш учун учун вақт ва масофа бўлмаган.

Месси бор-йўғи 11 сония давомида 55 метр масофани босиб ўтди ҳамда йўл-йўлакай 3-4 нафар футболчини алдади. Шу вақт давомида атиги 2 марта тўпни ўзидан 70 сантиметр масофага қочирган. Қолган вақтда эса тўп доимо унинг ёнида бўлган.

Лионель сўнгги  зарбани 75 даража бурчак остида йўллаган. Агар зарба йўналиш бурчаги бироз ўзгарса ҳам тўп ё устунга тегарди, ёки дарвозабон уни қайтарган бўларди.

Эслатиб ўтамиз, ўтган йилги Испания кубоги финалида «Барселона» «Атлетик» устидан 3:1 ҳисобида ғалаба қозонган.