УEФА "Бенфика" ва "Реал" ўртасидаги Чемпионлар лигаси ўйинида содир бўлган можарони ўрганмоқда. Маълумки, Винисиус Жуниор рақиб футболчиси Жанлука Престианнини ирқчилик руҳидаги ҳақоратда айблаган эди.
"ESPN" нашрига маълум бўлишича, Престианни УEФАга кўрсатма берган. "Бенфика" футболчиси испан тилида ирқчилик ҳақорати ҳисобланувчи "mono" (маймун) сўзини ишлатганини инкор этмоқда. Аргентиналикнинг сўзларига кўра, у "m" ҳарфи билан бошланувчи бошқа бир совуқ сўзни айтган. Ушбу сўз ҳам ҳақорат ҳисобланади, аммо ирқчиликка алоқаси йўқ — у жинсий ориентацияси анъанавий бўлмаган эркакларга нисбатан ишлатиладиган ҳақоратли иборадир.
Қайд этиш лозимки, Жанлука Престианни воқеа содир бўлаётган вақтда оғзини либоси билан ёпиб олган эди, шу сабабли лабдан ўқийдиган экспертларни жалб қилиш фойда бермайди.
Эслатиб ўтамиз, "Реал" сафарда "Бенфика"ни 1:0 ҳисобида мағлуб этган эди.
