UEFA "Benfika" va "Real" o‘rtasidagi Chempionlar ligasi o‘yinida sodir bo‘lgan mojaroni o‘rganmoqda. Ma’lumki, Vinisius Junior raqib futbolchisi Janluka Prestiannini irqchilik ruhidagi haqoratda ayblagan edi.

"ESPN" nashriga ma’lum bo‘lishicha, Prestianni UEFAga ko‘rsatma bergan. "Benfika" futbolchisi ispan tilida irqchilik haqorati hisoblanuvchi "mono" (maymun) so‘zini ishlatganini inkor etmoqda. Argentinalikning so‘zlariga ko‘ra, u "m" harfi bilan boshlanuvchi boshqa bir sovuq so‘zni aytgan. Ushbu so‘z ham haqorat hisoblanadi, ammo irqchilikka aloqasi yo‘q — u jinsiy oriyentasiyasi an’anaviy bo‘lmagan erkaklarga nisbatan ishlatiladigan haqoratli iboradir.

Qayd etish lozimki, Janluka Prestianni voqea sodir bo‘layotgan vaqtda og‘zini libosi bilan yopib olgan edi, shu sababli labdan o‘qiydigan ekspertlarni jalb qilish foyda bermaydi.

Eslatib o‘tamiz, "Real" safarda "Benfika"ni 1:0 hisobida mag‘lub etgan edi.