Россия Футбол уюшмаси раҳбари Виталий Мутконинг маълум қилишича, Ҳамдўстлик Кубоги бутунлай ўзгартирилади ёки йўқ қилинади. 23 январь куни Россия ёшлар терма жамоаси 2013 йилдан бери илк марта турнирда ғалаба қилганди.
"Биз ўйлаб кўрамиз. Ёки бу турнирни ўтказишни бутунлай тўхтатамиз, ёки уни бутунлай ислоҳ қиламиз. Бу турнир дастлаб бошқа мақсадларда ташкил этилганди, эндиликда турнир ўзининг моҳиятини йўқотиб бўлган. Иштирокчи жамоалар турнир вақтида баҳорги ўйинларга тайёрланаётган бўлади ва футболчиларини турнирда қатнашиш учун жўнатмайди.
Ҳамдўстлик кубоги турнири СССР чемпионатини қўмсаб, ташкил этилганди. Бугунги кунга келиб ҳеч кимда ундай ностальгия қолмаган. МДҲнинг барча давлатлари ўз йўлидан кетмоқда. Авваллари турнирда доимий равишда иштирок этиб келган жамоалар эндиликда вақтни бошқа турнирларда ёки йиғинларда ўтказишмоқда", дейди Мутко "Р-Спорт" нашрига.
Эслатиб ўтамиз, Ўзбекистон 2014 йилдан буён Ҳамдўстлик Кубогида иштирок этишни тўхтатган.
