Ўзбекистон Экологик ҳаракати Тошкент шаҳар ҳудудий бўлинмаси томонидан Яшнобод тумани “Беҳизор” маҳалла фуқаролар йиғини билан ҳамкорликда 2015 йилда дунёнинг энг яхши ҳаками деб топилган Равшан Эрматов билан маҳалла аҳолиси ўртасида учрашув ташкил қилинди, деб хабар беради UzReport агентлиги.
Тадбирда Ўзбекистон экологик ҳаракати ходимлари, маҳалла фаоллари, Яшнобод туманидаги 230 ва 198-мактаб ўқувчилари, спорт ихлосмандлари ва оммавий ахборот воситалари ходимлари қатнашишди.
Унда Осиёнинг 5 карра энг яхши ҳаками Равшан Эрматов сўзга чиқиб, ўзининг босиб ўтган ҳаёт йўли ва спортга кириб келган кунидан бошлаб мамлакатимизда футбол соҳасида қўлга киритилган ютуқлар, ҳакамлик мактабини яратиш бўйича амалга оширилаётган чора-тадбирлар борасида сўзлаб берди.
Учрашув давомида Яшнобод туманидаги мактаб ўқувчилари ва маҳалла фаоллари Эрматовга ўзларини қизиқтирган саволлар билан мурожаат қилишди ва батафсил жавобларга эга бўлишди.
