"Локомотив” бугундан эътиборан Тошкентдаги машғулотларини бошлайди.
Шанба куни кечки пайт Дубайдаги йиғиндан қайтиб келган футболчиларга икки кунлик дам берилганди. Бугун тушда улар бош мураббий Мирко Еличич ихтиёрига етиб келишади ҳамда 1 февралга қадар кунига бир маҳалдан машғулот ўтказишади. 2 февраль куни жамоа аъзолари ҳориждаги иккинчи йиғинни ўтказиш учун Дубай шаҳрига йўл олишади.
Пойтахтимиздаги йиғин давомида битта ўртоқлик учрашуви ўтказиш режалаштирилган. 29 январь куни “Бухоро” клуби ТТМИга қарашли стадионда меҳмон бўлади. Учрашув соат 11:00 да бошланади.
Бугун клуб базасида “Локомотив”нинг барча футболчилари жам бўлади. Ўзбекистон олимпия терма жамоаси билан Қатардан қайтиб келган Икром Алибоев ҳам машғулотларга қўшилади. Фақатгина Садриддин Абдуллаевда кичик жароҳат бор. Катта эҳтимол билан у бугундан эътиборан якка ҳолда югуришни бошлайди.
Дубайдаги биринчи йиғинда мураббийлар штаби иккита легионер футболчини синовдан ўтказиб кўргани ҳақида хабар бергандик. Черногориялик Иван Вуковичнинг ҳаракатлари клуб мутахассисларига маъқул келмади ва у Дубайнинг ўзида “Локомотив” билан хайрлашди. Сербиялик Ненад Иняц эса “темирйўлчилар” сафида Тошкентга етиб келган. Ҳужумчининг “Локомотив” сафида қолиш ёки қолмаслиги ҳозирча аниқ эмас. Словакия термасига қарши ўйинда фақатгина битта бўлимда ҳаракат қилгани учун, у ҳақда аниқ хулосага келиш қийин эди. Воқеалар ривожи билан таништириб борамиз.
