ФИФА президентлиги учун номзодлардан бири, шайх Салмон ибн Иброҳим Ал-Халифа сайловда ғалаба қиладиган бўлса, 2018 йилги ЖЧ Россияда ўтиши учун барча ишни қилишга ваъда берди. У бу ҳақда "Р-Спорт" нашрига берган интервьюсида айтиб ўтган.
"Мендаги маълумотларга кўра, Россияни 2018 йилги мундиал мезбонлигидан маҳрум этиш учун ҳеч қандай асос йўқ. Мен ишонч билан айтишим мумкинки, бу чемпионат сизнинг юртингизда ўтказилади. Агар президентликка сайлансам, мен буни таъминлаш учун барча ишни қиламан. Мен биламанки, Россия бу мундиални қабул қилиш учун кўп иш олиб бормоқда. Мен бу чемпионат бошланишини, ажойиб ва ўзига хос маданият ҳамда анъаналарга эга Россиядаги мундиал очилиши бошланишини сабрсизлик билан кутмоқдаман. Худди шу каби фикрларни 2022 йилда Қатарда ўтадиган ЖЧ ҳақида ҳам айтишим мумкин", дейди у.
Эслатиб ўтамиз, ФИФАнинг янги президентини аниқлаш учун сайлов Цюрих шаҳрида 26 февраль куни ўтказилади.
Сайловда УЕФА бош котиби Инфантино, ОФК президенти шайх Салмон ибн Иброҳим Ал-Халифа, Иордания шаҳзодаси Али бин Ал-Ҳусайн, ФИФАнинг собиқ бош котиби Жером Шампань ва жанубий африкалик миллионер Токио Сексвале номзод сифатида кураш олиб боришмоқда.
