Ироқ олимпия терма жамоаси Рио-2016 йўлланмасини қўлга киритди. Қатар терма жамоаси эса ўз уйида ўтказилган Осиё чемпионатида бронза медалини қўлга кирита олмади.

Қатарликлар биринчи бўлимни жуда яхши ўтказишди. Мусобақа тўпурари Аҳмад Алауддин учрашувнинг 27-дақиқасида ҳисобни очишга муваффақ бўлди. Бу Аҳмаднинг турнирдаги 6-голи бўлди. Ушбу голдан кейин ҳам мезбонлар дарвозани ишғол қилиш учун бир нечта имкониятларга эга бўлди, аммо улардан фойдалана олмади. Жумладан Аҳмад Афиф яккама-якка вазиятдан дарвозани ишғол қила олмади.

Иккинчи бўлимда эса Ироқ аста-секин босимни ошириб борган бўлса, Қатар ҳисобни ушлаб қолишга ҳаракат қилди. Ўйиннинг асосий вақти тугашига 4 дақиқа қолганида майдон марказидан етказилган узатмани Муҳаннад Абдулраҳим бош билан дарвозага жойлади.

Қўшимча бўлимларнинг иккинчисида Айман Ҳуссайн бош билан зарба бериб, Ироқни ҳисобда олдинга олиб чиқди.

Шундан сўнг қатарликларда ҳисобни тенглаштириш учун иккита имкониятга эга бўлишди. Абдулкарим Ҳассаннинг бош билан берган зарбаси тўсинга тегиб қайтган бўлса, Мунтарий 4-5 метрдан дарвозани ишғол қила олмади.

Шу тариқа, Ироқ олимпия терма жамоаси Осиё чемпионатининг бронза медали билан бирга Рио-2016 олимпиадаси йўлланмасини қўлга киритди. Ўзбекистон олимпиячилари ўрин олган "С" гуруҳининг икки вакили Бразилия йўлланмасига эга бўлгани эътиборли ҳолат.

Ёшлар (U23) ўртасида Осиё чемпионати
3-ўрин учун ўйин
ҚАТАР - ИРОҚ - 2:3
Голлар: Аҳмад Алауддин (27) — Муҳаннад Абдулраҳим (86), Айман Ҳуссайн (109)