Биласиз, айни пайтга келиб Олий Лиганинг барча жамоалари янги мавсумга тайёргарлик жараёнига зўр беришган. Шу жумладан, “Андижон” жамоаси ҳам Тошкентда йиғин ўтказмоқда.
Биз эса “бургутлар” жамоасининг ишонган ҳимоячиларидан бири Жавлон Гусейнов билан клубнинг янги мавсумга тайёргарлиги борасида суҳбатлашдик. Ўтган мавсумда “Андижон” жамоаси сафида 29 та учрашувда майдонга тушган 24 ёшли маҳоратли футболчи тайёргарлик жараёнининг ажойиб руҳда давом этаётганини таъкидлади.
- Янги мавсумга тайёргарлик жараёни қандай давом этмоқда?
- “Андижон” жамоаси ҳам қолган клублар сингари янги мавсумга ҳозирлик ишларини давом эттирмоқда. Жамоамиз йиғинлар давомида турли хил синов-назорат баҳсларида ҳам майдонга тушмоқда. Қолаверса, йиғинга бир қатор янги футболчилар ҳам келиб қўшила бошлади. Таркиб имкон қадар кучайтирилмоқда. Умуман олганда, янги мавсумга ёмон тайёргарлик кўраётганимиз йўқ.
- Клубда бош мураббий ўзгарди, қолаверса янгилар келишда давом этмоқда…
- Ҳа, “Андижон” жамоасини эндиликда барчамизга яхши таниш бўлган мутахассис Бахтиёр Ашурматов бошқаради. Ушбу инсонни юртимизда ҳамма яхши билади. У киши футболчилик даврида айнан менинг позициямда ўйнаган, шу сабабли Бахтиёр аканинг ўйинларига ёшлигимдан хавас қилардим. Мана энди шу инсонни қўл остида ўйнаш насиб этди. Бундан хурсандман. Ишонаманки, Бахтиёр Ашурматов “Андижон” жамоасига чиройли ўйин ва ғалаба руҳини олиб кира олади.
- Жавлон, ўзингиз янги мавсумни ҳам “Андижон”да ўтказасиз. Шундайми?
- Ҳа, яқинда жамоамизнинг янги бош мураббийи билан гаплашиб олдик. У киши менга ишонч билдирмоқда. Мен ҳам ўз навбатида янги мавсумда ўзим кўрсатадиган ўйин билан ушбу ишончни оқлашга ҳаракат қиламан.
- Келаётган мавсумда жамоа олдига аниқ бир вазифа қўйилмоқдами?
- Шартнома тузилаётганда клуб раҳбарияти томонидан футболчилар ва жамоа олдига янги мавсумда 10-ўриндан паст бўлмаган натижа қайд этилиши лозим экани таъкидланди. Биз келаётган мавсумда имкон қадар ҳар бир учрашувда яхши ўйин намойиш этиб, кўпроқ очко жамғаришга ва чиройли ғалабалар билан ўз ишқибозларимизни хушнуд этишга ҳаракат қиламиз.
Зоҳирбек Акрамхонов суҳбатлашди
