“Локомотив”нинг Осиё чемпионлар лигасидаги рақиби – Эроннинг “Сепахон” клуби навбатдаги мағлубиятини қабул қилиб олди. Шу тариқа Фозил Мусаев жамоадошлари 10-пағонадан юқорига кўтарила олишмади.

Турнир жадвалида ўзидан олдинроқда бораётган “Сайпа”ни қабул қилган “Локомотив”нинг рақиби 60 ҳамда 79-дақиқаларда ўз дарвозасидан гол ўтказиб юборди. 92-дақиқага келиб бразилиялик Лусиано Чимба томонидан урилган гол ҳисобни қисқартириш учунгина хизмат қилди – 1:2.

“Сепахон” навбатдаги турни 18 февраль куни 7-пағонада бораётган “Трактор Сози” клубига қарши сафарда ўтказади.

Гуруҳимиздаги яна бир рақиб – БААнинг “Ан-Наср”и ҳам ўз миллий чемпионатида мағлубият аламини тотиб кўрди. Иван Йованович шогирдлари 6-ўринда бораётган “Ал-Вахда” майдонида имкониятни бой беришди. Ўйин тақдирини ҳал қилган ягона голни мезбонлар 6-дақиқадаёқ киритиб улгуришганди.

Шу куни “Ан-Наср” сафида тўрт нафар легионер футболчи ҳаракат қилганини қайд этиш керак. 18 та ўйинда 32 очко жамғарган клуб лигада 3-ўринни эгаллаб турибди. Пешқадам “Ал-Айн” 14, 2-пағонадаги “Ал-Аҳли” 9 очкога илгарилаб кетишган. “Ан-Наср” навбатдаги турни 18 февраль куни ўз майдонида 8-ўриндаги “Дибба Ал-Фужайра”га қарши ўтказади.

“Локомотив”нинг чемпионлар лигасидаги биринчи рақиби “Ал-Иттиход” 9 февраль кунги плей-офф ўйинидан кейин майдонга бошқа чиқмади. Саудия Арабистони чемпионатида 3-ўринда бораётган Жидда клуби эртага 9-пағонадаги “Ал-Файсали” меҳмони бўлади.

Эслатиб ўтамиз, “темирйўлчилар” бугун Хитой Супер лигаси вакили “Тяньцзинь Теда” билан дуранг ўйнашди.