Хабарингиз борки, “Навбаҳор” ўйингоҳи қайта реконструкция қилингач, жамоа футболчилари истиқомат қиладиган уч қаватли бино ҳам таъмирланганди. Маълум сабабларга кўра ўтган йиллар давомида таъмирлаш ишлари якунига етказилмаганди. Айнан шу сабабли, жамоа мураббийлари ва футболчилари Намангандаги йиғинлар давомида меҳмонхоналарда истиқомат қилиб келишди. Бу йилги мавсумда жамоа аъзоларига қулайлик яратиш мақсадида, Наманган вилоят ҳокими Х.Бозаров клуб қароргоҳидаги таъмирлаш ишларини якунлаш ва хоналарни зарур жиҳозлар билан таъминлаш борасида тегишли ташкилот ва корхоналарга топшириқ берган эди.
Шу кунларда клуб қароргоҳида олиб борилаётган ишлар якунига етказилмоқда. Жамоа аъзоларини замонавий талабларга жавоб берадиган хоналарда истиқомат қилишлари учун ҳаракат қилинмоқда. Айни пайтга келиб, клуб қароргоҳидаги пардозлаш ишлари деярли якунланиб бўлди. Шунингдек, хоналарни зарур жиҳозлар билан таъминлаш ишларига ҳам киришилди. Дастлабки режаларга кўра яқин кунлар ичида клуб қароргоҳини мураббий ва футболчиларнинг ихтиёрига топшириш кўзда тутилган.