Янги мавсумга Тошкентда қизғин ҳозирлик кўраётган Муборакнинг «Машъал» клуби ўқув-машғулот йиғини доирасида ўртоқлик ўйинларига ҳам жиддий эътибор қаратяпти. «Газчилар» ўтган йили чемпионатда 7-ўринни банд этишганди. Жамоа раҳбарияти футболчилар ва мураббийлар штаби зиммасига жорий йилда ана шу натижани яхшилаш вазифасини қўйишган. Биз «Машъал»нинг «Обод» стадионида ўтказган машғулотидан сўнг бош мураббий Александр Хомяковдан интервью олдик.
- Мавсумга тайёргарлик режа асосида давом этяпти, - деди «Машъал» устози ўқув-машғулот йиғинлари ҳақида гапираркан. - Кунига икки маҳалдан шуғулланяпмиз, ўртоқлик учрашувлари ташкил этиляпти. Жумладан, Қибрайда «Пахтакор»га қарши ўйинда майдонга тушдик. Шаҳбоз Эркиновнинг голидан сўнг ҳисобда олдинга чиқиб олгандик. Лекин баҳс якунига қадар ғалабани ушлаб қола билмадик. Етти дақиқа ичида дарвозамиздан иккита тўп ўтказиб юбордик. Олдинда яна режалаштирган ўйинларимиз бор. Клуб раҳбарияти барча шароитларни яратиб берган. Нолишга асло ҳаққимиз йўқ. Об-ҳаво яхши, айни тайёргарлик учун мўлжаллангандек.
- Таркибдаги янги футболчиларнинг жамоа ўйинига мослашиш жараёни қандай кечяпти?
- Ёмон эмас. Талабларимизни бажаришга интилишяпти. Бунинг учун бироз вақт керак. Янгилардан Шаҳбоз Эркинов машғулотларда астойдил ишлаяпти. Ҳали селекция ишлари тўхтагани йўқ. Кучайишга муҳтож чизиқларимиз бор. Ҳозир шу ҳақда бош қотиряпмиз.
- Айнан қайси чизиқ ёки позицияни кучайтириш керак?
- Биринчи галда ярим ҳимоячи излаяпмиз. Никита Букаткин жамоамизни тарк этгач, таянч зонаси кучсизланиб қолган. Бу позицияга футболчи топиш эса нисбатан қийинроқ.
- Шаҳбоз Эркинов ҳақида қандай фикрдасиз?
- У жамоамиз ўйинига мослашиб боряпти, ўртоқлик ўйинларида ўзини кўрсатяпти. Ўйлайманки, тажрибали ҳужумчи янги мавсумда тўпурарлик маҳоратини намойиш этиб, жамоамизга фойда келтиради. Эркинов билан шартнома имзоладик, у «Машъал»нинг тўлақонли аъзосига айланди.
- Зоҳир Қўзибоев дастлаб «Насаф»га ўтиб, кейин яна «Машъал»га қайтди...
- Бу ҳақда у билан гаплашмадим. Асосийси, сафимизда бўлиб турганидан хурсандман. Қолгани Қўзибоевнинг ўзига боғлиқ. Ундан умидим катта. Ҳар ҳолда, миллий термага номзод ҳужумчи. Буни ҳали ўйинлари билан ҳам исботлаши керак.
- Келгусидаги режалар қандай?
- Тошкентдаги йиғинимиз якунлангач, футболчиларга 3-4 кунлик дам берамиз. Сўнгра Янгиерга йўл олиб, 10 кун давомида ўша ерда машғулот ўтказамиз. Табиийки, ўртоқлик учрашувлари ҳам ташкил этилади. Сўнгги иккита ўйин орқали асосий таркибни аниқлаб олишни мақсад қилганмиз.
- «Машъал» олдига янги мавсум учун аниқ вазифа қўйилдими?
- Биз турнир жадвалига қарамаймиз. Олдиндан оламшумул ваъдаларни бермаймиз. Биринчи галда мухлисларимизни хушнуд қилишга уринамиз. Ҳар бир ўйинда фақат ғалабани кўзлаб майдонга чиқамиз. Мақсадимиз - ўтган йилги кўрсаткични яхшилаш. Олий лига ва Ўзбекистон кубоги баҳсларида ижобий натижа кўрсатиш, имкон қадар узоқроққа етиб боришга интиламиз.
- Молиявий масалаларда муаммо туғилмаяптими?
- Ўтган йилгидан маълум миқдорда қарзорлик бор. Лекин клуб раҳбарияти мавжуд ҳолатни ижобий ҳал этишга ҳаракат қиляпти. Мавсум бошлангунига қадар барча қарзлар тўлаб берилади, деган умиддаман.
Камолиддин АЛИМОВ суҳбатлашди, "ИнтерФУТБОЛ" нашри
