Ҳозиргина “Ўзбекистон” спорт мажмуасида Эрон ҳамда Вьетнам терма жамоалари ўртасида ярим финал учрашуви якунланди. Эронликларнинг голлар “ёмғири” остида ўтаган ўйин 13:1 ҳисобида якунланди.
Ўйиндан сўнг ҳар икки терма жамоа устозлари иштирокида матбуот анжумани ташкил этилди. Унда Вьетнам терма жамоаси бош мураббийи Бруно Гарсия қуйидагиларни таъкидлади:
- Бизнинг футзалчиларимиз бугун рақибга етарлича қаршилик кўрсата олишмади. Биз охирги 2 та учрашувда катта куч сарфлагандик. Бу эса бугунги ўйинга тўла тайёр ҳолда етиб кела олмаслигимизга сабаб бўлди. Эрон эса нисбатан кучсизроқ термаларга нисабат ўйнаб келди. Уларнинг ўйинчиларида шу сабабли ҳам чарчоқ аломатлари сезилмади.
Таркибимизда маҳоратли дарвозабонлар бор. Мағлубиятда фақатгина дарвозабонни айблаш нотўғри.
Энди олдинда бизни яна бир муҳим ўйин кутмоқда. Ана энди бу қақшатқич мағлубиятни унутган ҳолда, кейинги баҳсга ҳозирлик кўришимиз лозим бўлади.
Финалда ким ғалаба қозонади?! Ҳайронман. Агар Ўзбекистон жамоавий ўйин намойиш этса, ғалабага эришиши мумкин. Лекин барибир Эрон термаси финалда фаворит, - дейди тажрибали мутахассис.
