Меҳриноз Аббосова, Зулфия номидаги давлат мукофоти совриндори: Бугунги кунда сиз ёшларимизнинг энг севимли қаҳрамонига айлангансиз. Сизни ҳам ўз қаҳрамонингиз бўлганми?

—Авваламбор инсон тарбияни ўз оиласида олади. Қадриятларни, урф-одатларга муносабатларни, Ватанни севишни, ватанпарварлик ҳиссини оилада ўрганиб камол топади. Мен ҳам Ўзбекистон фарзандиман, ҳеч кимдан кам эмасман. Бунинг учун фидоийлик, ҳалоллик, меҳнат, ўзбекона муносабат, бағрикенглик, инсонийлик муҳим ҳисобланади. Мен учун ота-онам ўз қаҳрамонларимдир, деб эътироф эта оламан. Уларнинг эътибори, ғамхўрлиги туфайли шу даражага эришдим.

Қайси вазиятга таяниб қарор қиласиз? Қарор қилишга қийналган энг қийин ҳолатингиз?

—Ҳар хил вазиятлар бўлади. Ўйинда тўп қаерда бўлса, ҳакам ҳам ўша ерда бўлиши керак. Шундай вазиятлар бўладики, бир сония ичида ёрдамчилар билан биргаликда тезкор анализ қилиб, тез қарор чиқариш керак. Футболчиларни феъл-атворини ўрганиб, тажриба асосида қарор қабул қиламан асосан. Энг қийин ҳолатда албатта кучли ҳаяжон бўлади, қачонки ҳаяжон бўлса ўша жойда масъулият юқори бўлади. Масъулият юқори бўлган жойда натижа яхши бўлади. Ҳакамни ҳар бир чиқарган қарори ўйинчиларнинг кайфиятига таъсир қилади, шу сабабли масъулият ва тўғри қарор жуда муҳим.