Бугун ўзбекистонлик футбол мухлисларини пойтахтимизда ажойиб беллашув кутиб турибди. Тошкентнинг “Локомотив” клуби мавсумдаги биринчи ўйинида Саудия Арабистони етакчиларидан бири, Осиё чемпионлар лигасида икки марта зафар қучган “Ал-Иттиход” клубига қарши майдонга тушади. Кеча ҳар икки клуб вакиллари ўйинолди машғулотини айнан “Локомотив” стадионида ўтказишди.
Стадион маъмурияти футбол мухлислари, спорт журналистлари ўйинни бевосита “Локомотив” аренасининг ўзидан кузатиб боришлари учун шароитларни муҳайё қилишди. Беллашув чипталари стадион кассасида сотилмоқда.
“Локомотив” футболчилари бугун футбол мухлисларимизнинг қўллаб-қувватлашлари ёрдамида мавсумдаги биринчи беллашувни ғалаба билан якунлашга ҳаракат қилишади. Жамоа етакчиларидан бири Тимур Кападзе айтиб ўтганидек, улар бугун майдоннинг ҳар бир қарич ери учун рақиб билан кураш олиб боришади.
Эслатиб ўтамиз, беллашув соат 15:00 да старт олади. Футбол мухлисларимизни “Локомотив” стадионидаги қизиқарли тўқнашувга таклиф этиб қоламиз.
