19 ёшгача бўлган футболчилар ўртасидаги Осиё чемпионатининг финал босқичига қуръа ташлаш маросими шу йилнинг 7 май куни Баҳрайн пойтахти Манама шаҳрида бўлиб ўтадиган бўлди.

Осиё футбол конфедерацияси ёшлар ўртасидаги қитъа чемпионатига қуръа ташлаш механизмини эълон қилди. Ўзбекистон ёшлар терма жамоаси қуръа жараёнида 1-саватчага жойлаштирилади. Бу саватчадан, шунингдек, мезбон жамоа Баҳрайн, Қатар ва КХДР терма жамоалари ҳам ўрин олишади. Қуръа натижасида Жасур Абдураимов жамоаси ушбу термалар билан бир гуруҳдан ўрин олмайди.

Қуръа жамоаларни 4тадан 4та гуруҳга ажратиб беради. Гуруҳ босқичи ўйинларидан кейин ҳар бир гуруҳдан иккитадан жамоа чорак финалга чиқади. Ярим финалга чиққан жамоалар эса 2017 йили Жанубий Кореяда ўтадиган Жаҳон чемпионати йўлланмасини қўлга киритади. Кореяликлар Баҳрайндаги мусобақада кучли тўртликка киришса, Осиёнинг бешинчи жамоаси ҳам ЖЧ-2017 йўлланмасига эга бўлади. Осиё чемпионатида 3-ўрин учун баҳс ўтказилмайди.

Ёшлар ўртасидаги Осиё чемпионати қуръа саватчалари таркиби:

1-саватча: Баҳрайн, Қатар, КХДР, Ўзбекистон.
2-саватча: Япония, Таиланд, БАА, Хитой.
3-саватча: Австралия, Ироқ, Жанубий Корея, Яман.
4-саватча: Эрон, Вьетнам, Саудия Арабистони, Тожикистон.