"Ал-Ҳилол" - "Пахтакор" учрашувидан олдинги матбуот анжуманида Нўъмон Ҳасанов ва Суҳроб Бердиев иштирок этишди.

Нўъмон ҲАСАНОВ ("Пахтакор" бош мураббийи): - "Ал-Ҳилол" Осиёнинг энг кучли клубларидан бири саналади. Ўйинга келсак, биз ғалаба учун келдик. Чиройли футбол кўрсатиб, мухлисларимизни хурсанд этишни хоҳлаймиз.

Уйдаги ўйинда биринчи бўлимда бизда яхши имкониятлар бўлди, бироқ улардан фойдалана олмадик. Иккинчи бўлимда эса йигитлар характер кўрсатишди. Бутун беллашув давомида фаоллик кўрсатиб, ҳужумкор футбол намойиш этишнинг имкони йўқ. Жамоамизда биз амал қиладиган ўйин фалсафаси мавжуд. Уни янада шакллантиришга интиламиз.

Суҳроб БЕРДИЕВ ("Пахтакор" ярим ҳимоячиси): - Рақиб кучли, лекин биз ўйинга жуда яхши тайёрландик. Баҳснинг аҳамиятини яхши тушуниб турибмиз. Ички чемпионатда мавсумни ҳали бошламадик, бироқ шундан ўйинлар кучингга ишонч юзага келтиради. Чемпионлар лигасидаги тажриба ички мусобақаларда асқотади. Мураббийлар кўрсатмаларини бажариб, учрашувда зафар қучишга ҳаракат қиламиз.