Бугун “Марказий” стадионда катта футбол. Қарши шаҳрида бу йилги Осиё чемпионлар лигасининг илк учрашуви бўлиб ўтадиўтказилади. Шуни эътиборга олиб, стадионга кириш тартиби ва стадионда мухлисларнинг ўзини қандай тутиш тартиблари ҳақида эслатиб ўтмоқчимиз.

Бугун учрашув соат 18:00да бошланади. Футбол ишқибозларининг стадионга киришига соат 16:00дан рухсат этилади.

Мухлислардан сўрар эдикки, стадионга ҳар қандай идишда ичимликлар, турли буюмлар олиб киришга уринманг.  Сув,  шарбатлар  ва енгил овқатлар савдоси стадион ҳудудида ташкил этилади. Шунингдек вояга етмаган болаларни ҳам мустақил стадионга киришига рухсат этилмайди. Болалар ўзларининг ота-оналари ёки яқинлари билан стадионга киришлари мумкин.

ОФК томонидан  бу йилги мавсумда ўйингоҳдаги тартибсизликлар  учун бир қанча иқтисодий жарималар кўлами оширилган. Масалан, пластик сув идишини майдонга улоқтириш 2 000 АҚШ долларигача жаримага тортилишига сабаб бўлади. Албатта бу сиз яхши кўрган клуб иқтисодига катта зарар келитирши мумкин.

Биз, ер юзига маданият ва илм тарқатган авлоднинг фарзандларимиз. Шундай экан келинг, байрамни байрамдек ўтказайлик. Севимли “Насаф” жамоасига сидқидилдан мухлислик қилайлик. Мириқиб дам олайлик.

Эслатиб ўтамиз, чипталар сотуви давом этмоқда ва соат 14:00да тўхтатилиши мумкин. Мухлисларнинг стадионга киритилиши ўйин бошланишига ярим соат қолганда тўхтатилиши мумкин. Шунинг учун агар сиз учрашувни бевосита стадионда томоша қилишни мақсад қилган бўлсангиз, вақтида чипта харид қилиб,  марҳамат “Марказий”га вақтлироқ ташриф буюринг.

Бугунги учрашув шунингдек Спорт ТВ ва Қашқадарё ТВ орқали тўғридан-тўғри намойиш этилади. Спорт ТВда ўйинни таниқли футбол шарҳловчиси Мурод Ризаев шарҳлаб боради. Қашқадарё ТВда эса ўзимизнинг устоз футбол шарҳловчимиз Хусан ака Темиров ушбу ўйиннинг шарҳига тайёргарлик кўрмоқдалар.

Ҳа, бугун Қаршида катта футбол байрами. Барча футбол ишқибозларига яхши кайфият ҳамроҳ бўлишини тилаб қоламиз.