"Қўқон-1912” жамоасининг иқтидорли ёшларидан бири, мавсум кашфиёти бўлиши кутилаётган Ойбек Рустамов Ўзбекистон U-19  терма жамоаси таркибида  Хитойда ўтказилган ҳалқаро турнирда иштирок этиб, ушбу мусобақада ғолиб бўлди. Янги мавсум олдидан ёш футболчимиз билан қисқача суҳбатда бўлдик.

– Ойбек, Хитой сафари таассуротлари билан ўртоқлашсангиз?

– Хитой уюштирган сафаримиз жуда омадли бўлди. Биз у ерда бош мураббийимиз Жасур ака Абдураимов бошчилигида 4 жамоа қатнашган ҳалқаро турнирда иштирок этдик. Дастлаб Хорватия, кейин мезбонлар ва сўнгги ўйинда  Филлипин терма жамоаларини мағлубиятга учратиб, турнир ғолиби бўлдик. Сафарга кетишда олдимизга қўйилган вазифани бажардик.

– Мураббийлар ўйинингиздан қониқишдими?

– Мураббийларимиз барчамизни майдонда синаб кўришди. Мен ҳам ҳар уччала ўйинда ҳам майдонга тушдим. Ҳаракатларим уларга ёқдими  ёки ёқмадими билмадим, лекин кейинги йиғинларга тайёр туришимни айтишди. Уйга вазифалар топширшди. Ўз устимда қандай ишлашим ҳақида  маслаҳатлар беришди.

– Терма жамоада қайси чизиқда ҳаракат қилдингиз?

– Хорватияга қарши ўйинда ҳимоя чизиғида харакат қилдим. Хитой ва Филлипин билан ўйинларда эса таянч ярим ҳимоячи вазифасини бажардим.

– Мана, янги мавсум ҳам бошланиш арафасида. Нима деб ўйлайсиз мураббийлар сизга асосий жамоада ишонч билдиришадими?

– Жамоамиз бош мураббийи Муродака Исмоилов биз ёшларга катта эьтибор қаратишмоқда. Машғулотларда бизни доим асосий таркибга тайёр бўлишимизни уқтириб келмоқдалар.  Мавсумга тайёргарлик жараёнида ўтказилган ўртоқлик ўйинларида мен каби ёшларни асосий таркибга тушуриб синовдан ўтказиб турдилар.  Энди бу ёғигаям бўш келмаймиз, имкон бўлган тақдирда мураббийлар ва мухлисларнинг ишончларини қозонишга ҳаракат қиламан. Бошланаётган чемпионатимизда жамоамизга омад тилайман. Ўйлайманки, жамоамиз бу йил ижобий натижалар билан қўқонлик мухлисларни хурсанд қилади.

   Акрамжон Мамадалиев суҳбатлашди