«Арсенал» жамоаси бош мураббийи Арсен Венгер Европада бир жамоани энг узоқ вақт (19 йил) давомида бошқариб турган биринчи рақамли мураббийга айланди.

66-ёшли бу франциялик мутахассис шу вақтгача 29,5 йиллик кўрсаткич билан пешқадам бўлиб турган «Портадаун» (Шимолий Ирландия) бош мураббийи Ронни Макфолл истеъфога чиққач, унинг ўрнига биринчи ўринга чиқиб олди.

Макфолл «Портадаун»ни 1986 йилнинг декабридан буён бошқариб келаётганди. У Алекс Фергюсон «Манчестер Юнайтед» бошқарувига келишидан 6 ҳафта ўтиб ирландлар жамоасида иш бошлаганди. Фергюсон эса 2013 йилнинг майида ишдан кетгач, бир жамоада узоқ вақт давомида ишлаш бўйича етакчиликни Макфоллга топширганди.

Маълумот учун, Арсен Венгер 1996 йилда Япониянинг «Нагоя Грампус Эйт» жамоасидан «Арсенал»га келганди.

У ўтган вақт ичида жамоа билан 1545та ўйин ўтказган ва 837тасида ғалаба қилиб, 369 марта мағлуб бўлган. Яна 339 учрашувда дуранг қайд этилган. Канонирлар унинг бошқаруви даврида узлуксиз равишда ЕЧЛ иштирокчиси бўлиб келади. Венгер жамоа билан 3 марта Англия чемпиони бўлган (1997-98, 2001-02, 2003-04). Шунингдек, 6 марта Англия Кубоги ва 6 марта Англия Суперкубоги қўлга киритилган.