Биласиз, миллий чемпионатимизда Олий Лига янги мавсуми старт олди.

Илк турда “Бухоро” жамоаси “Олмалиқ”қа қарши баҳс юритди ва 18352 томошабин гувоҳлигида ўтган матчда 2:0 ҳисобида ғалабага эришди. Учрашувда киритилган иккинчи голга жамоа етакчиси Суҳроб Нематов муаллифлик қилди.

Тажрибали ярим ҳимоячи SPORTS.uz интернет-порталига ўйин борасидаги таассуротларини бўлишди.

- Шукр, чемпионатни ғалаба билан бошлаб олдик. Бундан жуда-жуда хурсандмиз. Сабаби стартни яхши олиш кейинги ўйинларга ҳам ўзининг ижобий таъсирини ўтказади. Аммо “Олмалиқ”қа қарши ўтган ўйин осон бўлмаганини ҳам айтиб ўтишим жоиз. Рақиб ҳам имкон қадар яхши ўйнашга интилди. Айниқса, биринчи бўлимда “Олмалиқ” бизга анча ташвиш туғдирди. Лекин иккинчи бўлимда биз устунликни қўлга ола билдик ва учрашувни ўз фойдамизга ҳал эта олдик. Киритган голим жамоамга фойда келтирганидан жуда ҳам шодман, - дейди тажрибали футболчи.

Таъкидлаб ўтамиз, “Бухоро” жамоаси иккинчи турда элита дебютанти “Обод” уйига сафар уюштиради. Мазкур матч 12 март куни бўлиб ўтади.