Испаниялик мутахассис Хосеп Гвардиола Голландиянинг Амстердам шаҳрида Англиянинг “Манчестер Сити” клуби спорт директори Чики Бегиристайн билан сирли музокара ўтказди.
Бу пинҳона учрашув душанба куни бўлиб ўтган. Лекин “Бавария” клуби бош мураббийи ҳамда Бегиристайн маҳаллий папарацциларнинг объективидан қочиб қутула олишмади.
Музокара Амстердам шаҳридаги Conservatorium Hotel меҳмонхонасида ўтказилди. Айтилишича, томонлар бу учрашув чоғида ёзги трансфер бозори чоғидаги трансферлар юзасидан суҳбатлашишган.
Инглиз клубига яқин манбаларнинг хабар беришича, Пеп “Эттихад Стэдиум”га “Эвертон” ҳимоячиси Жон Стоунз, “Ювентус” хавбеки Пол Погба, Дортмунднинг “Боруссия” клуби ярим ҳимоячиси Илкай Гюндоган ҳамда “Серветт” жамоаси ҳужумчиси Лоренсо Гонсалесни олиб келишни мақсад қилган.
Бундан ташқари, испаниялик мутахассис ўз жамоаси таркибида ёш истеъдодли футболчилар – “Аякс” ҳужумкор ярим ҳимоячиси Ришедли Базур ҳамда Даниянинг “Норшелланд” клуби вакили Эмре Морани кўриш истагини билдирган.