Олий Лига 2-туридан ўрин олган “Обод” — “Бухоро” ўйинидан сўнг ҳар икки жамоа устозлари ўртасида матбуот анжумани ташкил этилди. Унда дастлаб мезбонлар мураббийи журналистлар саволларига жавоб қайтарган бўлса, ундан кейин Жамшид Саидов ўйин ҳақида ўз фикрларини билдириб ўтди.

"Жамоамиз футболчилари рақиб имкониятини тўғри баҳоламади ва бир неча қулай вазиятлардан фойлана олишмади. Бундан ташқари майдонда кўп хатоларга йўл қўйилди.Техник ва тактик жиҳатдан ўйиндан қониқиш ҳосил қилмадим. Аммо олдинда ўйинлар кўп. Энди шуларга эътибор қаратамиз. Олий лига 2-турлигини ҳисобга олсак, бундай муаммолар юзага келиши табиий. Ўйлайманки, секин-аста буларни бартараф этиб борамиз.

Таркибда бир неча футболчилар ҳали ўйинга тайёр эмасди. Шунча яхши футболчиларни йиғдик. Улар тажрибали ўйинчилар. Аммо уларнинг бугунги ўйинидан кўнглим тўлмади. Шундай бўлгандан кейин улар яхшироқ ўйин намойиш этиш керак эди. "Обод" ёш, курашга чанқоқ ва ҳаракатчан жамоа. Ҳозирда жамоаларнинг имконияти баҳолаш учун бироз эрта. Кейинги бир неча ўйинлардан сўнг натижани кўрамиз", — дейди Жамшид Саидов.

Эслатиб ўтамиз, мазкур учрашувда ҳисоб очилмади - 0:0. "Обод" 3-турда "Насаф" майдонига сафар уюштирса, "Бухоро" ўз майдонида "Пахтакор"ни қабул қилади.