Осиёнинг энг кучли миллий чемпионатларидан бири саналувчи Қатар Юлдузлар Лигасида 22-тур учрашувлари бўлиб ўтди.

Ҳамюртимиз Сардор Рашидовнинг жамоаси кутилмаганда мағлуб бўлгани ҳақида хабар берган эдик. Яна бир ўзбекистонлик маҳоратли футболчи Санжар Турсунов фаолият олиб бораётган “Умм Салал” жамоаси бу турда “Ал Аҳли” уйига сафар уюштирди. Анчагина қизиқарли ва голларга бой тарзда ўтган матчда “Аҳли” 4:2 ҳисобида зафар қучди.

Ўзбекистон терма жамоаси ярим ҳимоячиси Санжар Турсунов илк дақиқалардан майдонга чиқди ва тўлиқ 90 дақиқа ўйнади.

22-турдан сўнг мусобақа жадвали қуйидагича кўриниш олди.

23-турда сиз-у бизни жуда қизиқарли беллашувлар кутмоқда. “Умм Салал” “Ал Вакра” билан баҳс юритса, Рашидовнинг “Ал Жаиш” жамоаси аллақачон 1-ўринни нақд қилиб қўйган “Ал Райян” билан тўқнаш келади. Яна бир қизиқарли ўтиши кутилаётган матчда “Лаҳвия” “Ал Садд”ни синовдан ўтказади. Мазкур ўйинлар 18-20 март кунлари бўлиб ўтади.