“Косонсой” жамоаси айни кунларда мамлакат биринчилигига қизғин ҳозирлик кўрмоқда. Тўғри, айрим сабаларга кўра жамоамиз Ўзбекистон кубоги мусобақасида иштирок этмаган бўлса-да, апрель ойининг дастлабки ҳафтасида бошланажак 1-лига турнирига тайёргарлик жараёнини ўтказмоқда.

Ҳозирда жамоа маҳаллий футболчилар билан бирга бир қатор тажрибали футболчилар машғулотларда иштирок этишмоқда. Хусусан, Сардор Теляков, Даврон Исоқов, Сардор Асқаров, Муҳаммад Расулов, Мурод Холмонов каби ўнлаб тажрибали футболчилар ҳам косонсойликлар сафида кўрикдан ўтишмоқда. Футболчиларимизни айни кунларда Абдулвосит Азизов, Меҳмон Солихўжаев,  Шуҳрат Бозоров ва Олимхон Турсунхўжаевдан иборат мураббийлар штаби шуғуллантириб туришмоқда.

Клубга тегишли бўлган “Марказий” ўйингоҳ жорий таъмирдан чиқарилди ва янги мавсумга шай ҳолатга келтирилди.

Айтганча, ўтган йилги таркибдан Азиз Маткаримов, Сардор Сотиболдиев, Абдураззоқ Жўраев “Цементчи”да, Ислом Имоилов “Обод”да, Азизбек Мамазоитов ва Мирғофур Абдулбоқиев “Навбаҳор”да ўз фаолиятларини давом эттиришадиган бўлишди.

Шу ўринда айтиш жоизки, "Косонсой" айни кунга келиб ПФЛ аъзолик бадалидан мавжуд бўлган қарздорликка барҳам берган ва бу борадаги турли миш-мишларга ўрин қолмади.

Шундай экан, мухлисларимиз жорий мавсумда ҳам "Косонсой"дан чиройли ва  мазмунли футбол кутиб қолишади. Эслатиб ўтамиз, “Косонсой” дастлабки 2 учрашувни сафарда, аниқроғи Бухорада (“Нурафшон” ва “Ғиждувон”) ўтказади.