Португалиялик мураббий Жозе Моуриньо “Манчестер Юнайтед” билан жамоанинг амалдаги бош мураббийи Луи ван Гал лавозимини эгаллаш бўйича дастлабки шартномани имзолади. Бу ҳақда El Pais нашри хабар бермоқда.

Нашрнинг таъкидлашича, шартномада агар Моуриньо билан “МЮ” 1 майгача шартнома имзоламаса, унда португалиялик 6,5 млн евро ва агар 1 июнгача имзоланмаса яна 13 млн евро товон пули олиши банди ҳам киритилган. Агар Моуриньо ўз фикридан қайтадиган бўлса, у ҳам жамоага товон пули тўлайди, бироқ бу сумма айтилмаган.

Аввалроқ ОАВда “Челси”дан қониқарсиз натижалар учун кетган Моуриньо “МЮ” билан шартнома шартларини келишиб олгани маълум қилинганди, унга кўра мураббийга уч йил ичида 60 млн евродан кўпроқ маош тўланади. Томонлар ўртасидаги музокаралар 1,5 ой давом этган.

Айни вақтда ван Гал бошчилигида “Манчестер Юнайтед” чемпионатда 6-ўринни эгаллаб турибди. Жамоа, шунингдек, Чемпионлар Лигаси гуруҳ босқичидан чиқа олмади, Европа лигасининг 1/8 финал босқичида эса “Ливерпул”га имкониятни бой бериб, бу мусобақани ҳам тарк этди.