Малайзияда 3 нафар ҳамюртимиз тўп сураётганидан хабарингиз бор.

Кеча ушбу юртда мамлакат кубоги чорак финал дастлабки ўйинлари ўтказилди. Лутфулла Тўраев фаолият олиб бораётган “Фелда Юнайтед” жамоаси ҳамда Дилшод Шарофетдинов тўп сураётган “Т-Тим” жамоалари аллақачон кубок беллашувларидан чиқиб кетганди.

Яна бир ҳамюртимиз Воҳид Шодиев ўйнаётган “Перак” эса кубок баҳсларида муваффақиятли одимламоқда. “Перак” чорак финалда “Куала Лумпур” билан тўқнаш келди. Илк ўйинда ипоҳликлар кичик ҳисобда зафар қучишди. Ўйин тақдирини ҳал этган ягона голни 7-дақиқада Ҳелми Ремели киритди.

Ҳамюртимиз Воҳид Шодиев ўйинни илк дақиқаларданоқ майдонда бошлади ва 84 дақиқа ўйнади. Сўнг у ўз ўрнини жамоадоши Ҳаким Исага бўшатиб берди.

Якунда ўйин “Перак”нинг 1:0 ҳисобидаги ғалабаси билан тугади.