Ўзбекистон ва Филиппин терма жамоалари ўртасидаги ўйиндан кейинги ташкил этилган матбуот анжуманида дастлаб меҳмонлар бош мураббийи Томас Дули иштирок этди.

— Аввалги ўйин билан таққослаганда, бугун яхши ҳаракат қилдик. 80 дақиқа давомида 10 киши бўлиб ўйнадик. Бир киши йўқлигини билдирмадик. Биз жуда яхши ўйнадик. Шогирдларим билан фахрланаман. Вазият қизил карточкага тортмасди. Менимча, ҳакам унинг аввалги иккита фоли учун четлатди. 40 мингга яқин мухлис қаршисида четлатиш катта аҳамиятга эга. Дарвозабонимиз ажойиб ўйин кўрсатди. У барчадан ажралиб турди. Умуман олганда, жамоамнинг ўйинидан жуда ҳам қониқиш ҳосил қилдим.

— Сўнгги 10 дақиқада жамоанингиз Ўзбекистонни ўз жарима майдончаси атрофидан майдон марказига сура олди. Нима учун жамоа эртароқ бундай қилмади?
— Ўзбекистонни майдон марказида кутиб олиб ўйнаш мумкин. Биз ўйинга тузган режамизга кўра, дастлабки дақиқаларда гол ўтказиб юбормаслигимиз керак эди. Шу боис, ўйинни бошидан прессингни қўллай олмасдик. Иккинчи бўлимда эса рақибни майдон марказида кутиб олиб, ҳужум ташикил қила бошладик. Ўзбекистонга қарши ўйин бошидан ўз жарима майдончамиздан узоқроқда ўйнай олмасдик. Балки 11 киши бўлиб ўйнаганимизда бошқачароқ ҳаракат қилишимиз мумкин эди.

— Бугун Ўзбекистон яхши ўйнамади. Жамоа ҳужумга берилиб кетиб, ҳимояда тартибли ўйин қилмади. Шундай ҳолатда Филиппин нима учун ғалабага ҳаракат қилмади?
— Биринчи навбатда, биз Ўзбекистонни яхши ўйнашига йўл қўймадик. Ўйиндан олдинга матбуот анжуманида айтганимдек, мен реалист мураббийман. Ўзбекистоннинг имкониятини жуда яхши биламан. Рақибимиз 35 минг мухлис қаршисида ўз уйида ўйнади. Биз эса ортга қайтиб, КХДРга қарши ўйнашимиз керак. Шу боис кучларимизни тўғри тақсимлашимиз керак. Яна такрорлайман, 11 киши бўлиб ўйнаганимизда, сиз айтганингиздек, ғалабага ҳаракат қилиб кўрсак бўларди. Бизнинг ҳолатимизда эса фақат курашиш мумкин эди. Бугунги ўйинда Филиппин нималарга қодирлигини, қандай ўйнай олишини кўрдингиз деб ўйлайман. Ушбу гуруҳда 3-ўринни эгаллаб, Осиё кубоги финал босқичига чиқишни ва унда Ўзбекистонга қарши яна шундай ўйин ўтказишни истайман.