Бирлашган Араб Амирликлари Про Лигаси қитъамиздаги энг кучли миллий чемпионатлар қаторига киришидан хабарингиз бор. Мазкур Лигада икки нафар ҳамюртларимиз тўп тепаётганини ҳам биласиз.
БААдаги нуфузли мусобақалардан бири саналувчи БАА Лига Кубогида финал учрашуви бўлиб ўтди. Унда ҳамюртимиз Азизбек Ҳайдаров фаолият олиб бораётган “Ал Шабаб” клуби “Ал Ваҳда”га қарши баҳс олиб борди. Жуда қизиқарли руҳда кечган ушбу матчда “Ваҳда” кичик ҳисобда зафар қучди ва ўз тарихида илк бор мазкур кубок соҳибига айланди.
Таъкидлаш жоиз, Ўзбекистон миллий терма жамоаси ярим ҳимоячиси ушбу ўйиннинг илк дақиқалариданоқ майдонда ҳаракат қилди. Лекин якунда унинг жамоаси мағлуб бўлди ва мусобақа бош совринини қўлга кирита олмади.
