Франция чемпионати 32-турида «ПСЖ» жамоаси ўз майдонида «Ницца» футболчиларини қабул қилди. Унда 4:1 ҳисоби қайд этилиб, парижликлар фойдасига ҳал бўлди, деб хабар беради «iSport.ua».

Учрашувнинг 15-дақиқасида Златан Ибрагимович ҳисобни очган бўлса, 18-дақиқада «Ницца» аъзоси Бен-Арфа орадаги мувозанатни тиклади. 34-дақиқада яна Златан Ибрагимович гол киритди ва жамоасини олдинга олиб чиқди — 2:1.

Ўйиннинг 48-дақиқасида Давид Луис «ПСЖ»нинг учинчи голига муаллифлик қилган бўлса, 82-дақиқада Ибрагимович жамоасининг тўртинчи голини киритиб, ўз ҳисобига хет-трик ёзиб қўйди. Учрашув «ПСЖ»нинг 4:1 ҳисобидаги ғалабаси билан якун топди.

Чемпионат якунланишига 8 тур қолганида Франция чемпионлигини расмийлаштирган Лоран Блан шогирдлари ғалабадан сўнг очколари сонини 80 тага етказиб олди. 50 очко билан қолиб кетган «Ницца» турнир жадвалининг тўртинчи поғонасини эгаллаб турибди.

Франция чемпионати, 32-тур
2 апрель, шанба. «Парк де Пренс»
«ПСЖ» – «Ницца» 4:1 (2:1)
Голлар: Ибрагимович (15, 34, 82), Давид Луис (48) – Бен-Арфа (18)
«ПСЖ»: Трапп, Тиаго Силва, Максвелл, Маркиньос, Давид Луис, Рабьо, Мотта (Стамбули, 69), Лукас (Нунку, 80), Матюиди, Онженда (Кавани, 69), Ибрагимович.
«Ницца»: Кардиналь, Ле Маршан, Бесс, Рикарду Перейра, Козьелло (Маллманн, 64), Хульт, Бен-Арфа, Менди, Сери (Рахерихариманана, 90), Плеа (Онора, 64), Жермен.
Огоҳлантириш: Тиаго Силва (68)