Футбол бўйича Осиё Чемпионлар Лигасининг «Б» гуруҳида иштирок этаётган Тошкентнинг «Бунёдкор» клуби 5 апрель, сешанба куни Эроннинг Исфаҳон шаҳрида «Зоб Оҳан» клубига қарши майдонга тушади. ЎзМТРК сайтидаги «Спорт» телеканалининг кўрсатувлар жадвалида учрашув трансляцияси 20:30 да бошланиши кўрсатиб ўтилган.
Скриншот: «MTRK.uz»
5 апрель куни, шунингдек, Қаршининг «Насаф» клуби ўз майдонида ўзбекистонлик футболчи Сардор Рашидов тўп сурадиган Қатарнинг «Ал-Жаиш» клубини қабул қилади. «Спорт» канали 18:45 да старт оладиган учрашувни тўғридан-тўғри трансляция қилишни режалаштирган.
18:45 да бошланадиган ўйин, 15 дақиқалик танаффусни ҳам қўшиб ҳисоблаганда, 20:30 да ўз ниҳоясига етади. Ҳар икки таймга қўшимча дақиқалар белгиланиши ҳам ҳисобга олинса, «Бунёдкор» иштирокидаги ўйин бироз кечикиб кўрсатилиши мумкин.
Қайд этиш керак, Осиё Чемпионлар Лигаси регламентига кўра, ўйин вақтини мезбон жамоанинг ўзи белгилайди.
Шунга ўхшаш ҳолат билан 2 апрель кунги «Барселона» — «Реал» ўйини олдидан Россиянинг «Матч ТВ» канали ҳам тўқнаш келди. Россия Премьер-лигаси доирасидаги «Ростов» — «Спартак» ўйини трансляциясининг якуни «Эль-Класико» намойишининг бошланишига тўғри келди.
Икки учрашув трансляцияси ўртасидаги реклама ва анонслар сабаб, Испания Ла Лигаси марказий учрашуви намойиши кечикиб бошланди. Кейинроқ, «Матч ТВ» мазкур ҳолат юзасидан ўз томошабинларидан расман узр сўради.
