"Челси" жамоаси директори Марина Грановская Антоне Конте жамоанинг янги мураббийи бўлиши эълон қилинганидан кейин жамоани айни вақтда бошқариб турган Гуус Ҳиддинкка бажарган ишлари учун миннатдорчилик билдирди.

Ҳолландиялик ушбу мутахассис 2015 йилнинг 17 декабрида аввалги бош мураббий Жозе Моуриньо ишдан бўшатилгач, мавсум охиригача жамоани бошқариши учун олиб келинганди.

Бугун лондонликлар жамоаси Антонио Конте билан 3 йиллик шартнома тузгани ва янги мавсумдан бошлаб у жамоага устозлик қилиши ҳақида расман эълон қилди.

"Биз дунёдаги энг ҳурматга сазовор мураббийлардан бири билан келишувга эришганимиздан хурсандмиз. Шу билан биргаликда, мавсум якунигача жамоада иш олиб борадиган Гуус Ҳиддинкка ҳам ўз миннатдорчиликларимизни билдирамиз. У ўтган вақт ичида жамоа учун катта ҳажмдаги ишни бажарди", дея унинг сўзларидан иқтибос келтиради жамоа расмий сайти.

Маълумот учун, "Челси" Ҳиддинк бошқарувида АПЛда ўтказилган 16 учрашувда бирон марта мағлубиятга учрамади (7та ғалаба, 9та дуранг). Бу вақт ичида жамоа 16 ўриндан 10 ўринга кўтарилди. Турнир якунланишига 6 тур қолганида лондонликлар жамоаси ҳисобидаги очколар сони 44та бўлиб турибди.