Хабарингиз бор, кеча Мануель Нойер "Бавария" клуби билан 2021 йилгача мўлжалланган янги шартнома имзолади.
Ушбу келишувга кўра, 30 ёшли посбон 5 йил давомида ҳар бир мавсумда 15 млн. евродан маош олади. Бу эса ўз-ўзидан уни жаҳондаги энг кўп маош оладиган дарвозабонга айлантиради.
Олдинги рекорд "Манчестер Юнайтед" жамоаси дарвозабонига тегишли эди. Сентябрда имзоланган шартномага кўра, Де Хеанинг йиллик маоши 10 млн. фунт (тах. 12,7 млн. евро) ташкил этади
ОАВ тарқатган хабарга кўра, Нойернинг олдинги шартномасида унинг йиллик маоши 8 млн. евро этиб белгиланган эди. Энди Мануель Томас Мюллер билан биргаликда Германиянинг энг кўп маош оладиган футболчисига айланди.
"У сўзсиз, жаҳоннинг энг яхши дарвозабони. Нойер Англия Банки каби ишончлидир", – дейди Карл-Хайнц Румменигге.
"Бавария", шунингдек, Мюллер, Мартинес, Боатенг, Алаба билан ҳам келишувни 2021 йилгача узайтиришга эришди.